Wannan wani zaure ne da aka kirkira a dandalin sadarwa na zamani, wato intanet.
An gina zauren ne a kan tsarin 'Groups' na babbar masana'antar sadarwa ta intanet da ke Amerika din nan mai suna Yahoo!
A wannan zauren namu mutane suna tattaunawa ne musamman a kan finafinan bidiyo na Hausa wadanda ake yayin su yanzu.
JE KA TA NAN

Sulaiman Sa'eed

Suleiman Sa'eed.

MAIJIDDA: Kwarai haka ne, saboda shi mayaudari ne kuma sai Allah ya kama shi da hakkin yaudara da yake na 'ya'yan mutane. Kuma ni ba fadan da muka yi da shi ne ya dame ni ba. Har zuwa na yi na same shi da wata yarinya Rahama, mai bille, na kulle su a daki da kwado. Kuma kashegari na dauko masa dansanda aka kulle shi saboda yaudarata da ya yi. Tunda Sulaiman Sa'eed har mahaifiyata ya sani, ba abin da bai sani ba a dangina. Kuma ni ma na sha zuwa Jos. Amma da yake mayaudari ne ya rika kawo 'yanmatan mutane yana yaudara. Lokacin da na zo ban san halinsa haka yake ba. Da na ga haka halinsa yake na ce ya bari, in bai bari ba... Rannan na je na same shi da wannan yarinyar, muka kama fada har ma ya kai ga ya mare ni. Wannan gidan da yake zaune ma ni na kama masa haya (lokacin) ba shi da gida. Daga baya kuma aka ga yana kawo 'yanmata sai makwabta suka ce ni ba mijina ba ne.

Da ya ce ke matarsa ce? Makwabtan sun ga kuna kwana tare ne ko kuwa?

MAIJIDDA: Dalilin da ya sa ya ce matarsa ce (shi ne) lokacin da muka je neman gidan tare muke zuwa da shi, yana bina muka je muka tambaya. To da suka gan ni da hijabina sai suka dauka ni matarsa ce. To da kuma aka samu gidan sai suka ga kuma ba sa ganina. Kuma ni na je na cire hijabina nasa ruwa na wanke dakin na na share.

Wane police station ne kika kai su?

MAIJIDDA: Police station din 'Fagge Division' na kai shi za a kulle shi. Sannan aka ce tunda soyayya ce mu dan fita mu sasanta. Muka fita. Ya dinga ba ni hakuri. Aka ce na hakura. Na ce na hakura.

An kai ga sakaya shin ko a'a?

MAIJIDDA: Har an tafi za a sakaya shin sai dai aka tausaya masa, sai ('yansandan) suka ce in na hakura shikenan a kyale shi, kuma in ban hakura to a kulle shi.

To ga shi ana fim a Zariya. Ko an taba kiranki Zariya ki je ki yi fim?

MAIJIDDA: E akwai wani fim da aka taba kirana to amma lokacin muna wani fim a nan ban je ba. To amma yanzu akwai wani fim da za mu je Kaduna ran ashirin ga watan nan (Yuli) na su Salisu Ma'azu. Amma 'yan Zariya gaskiya ban masu fim ba.

Ban da wannan fim din wadanne finafinai ke gabanki?

MAIJIDDA: Nan gaba a gaskiya ina da fim kamar hudu ban san kuma wanda Allah zai kawo ba. Nna san ina da su presently a hannuna.

Maijidda, lokacin da Balaraba tarasu akwai wata yarinya Hadiza wadda ta saci kudin Balaraba kuma an ce a gabanki aka yi abin. Shin meye gaskiyar abin?

MAIJIDDA: E gaskiya ne ta saci kudin, saboda a lokacin da hatsari ya faru an ce in dauki kayan Balaraba in rike. To kafin in dauka sai ita ta dauka. Da ma ni ba wannan ba ne a gabana saboda ban san a inda muke ba saboda kidimewar wannan hatsarin da ya faru. To ita kuma yarinyar sai ta fara suma, kuma da ma da aka kawo mu sai na ga ta yadda jakar, a cikin jakar kuma akwai wani turare ya fashe, sai na dauka ina ta kuka. To tana cikin suman ne sai na ga kullin abu a siket dinta. Sai na ce bari in dauke kar a sace mata to sai na ji kanshin turaren Balaraba. Sai na ce "A, to ai wannan ma kudin na Balaraba ne." Sai na ce, "Jama'a don Allah ku shinshina min wannan." Sai aka shinshina aka ji aka ce iri daya ne da wancan danshin.

Sai aka ce wannan kudin Balaraba ne. Sai na tambaya cewa "Da kudi a cikin jakar Balaraba?" Sai aka ce akwai, kudi sama da dubu ashirin a cikin jakar. Sai na ce, "To ni ga wanda na gani." Sai aka duba aka ga dubu biyu ne. Ashe akwai sauran kudin a cikin siket dinta. Bayan ta farfado muka tambaye ta sai ta ce nata ne wai. Muka bude mata wuta, sai ta ce wai na Balaraba ne ajiye mata ta yi, wai ba ta dauka da wata niyya ba ne.

To ita kenan sumar karya ta yi?

MAIJIDDA: In ma dai da gaske ne mu dai ta saci kudin Balaraba, ba za mu iya ce wa na karya ba ne don ba wanda abin bai buge shi ba. Amma mu dai mun ga kudin a siket dinta.

Ita wannan Hadiza din ta taba yin fim?

MAIJIDDA: Ta taba yin wani fim har ma na ga fostar a ofishin Tahir, amma bai fito ba kuma na mance sunansa, kuma ta yi fitowa daya a cikin wani fim da muka yi da ita mai suna Matsala; shi ma bai fito ba.

Dawayya ta mare ni, ni kuma na rama

MAIMUNA Husaina ba ta yi ficen Rukayya Umar Santa ba, to amma wannan bai hana su ba hammata iska a Zariya ba. Fadansu ya faru ne lokacin da su Rukayya suka je yin shirin Dawayya 2, wanda ita ce jarumarsa. To bayan an gama Dawayya 2 sai Rukayya ta shiga fim din Manufa 2, wanda ake yi a lokacin. A nan ne suka hadu da Maimuna.

An haifi Maimuna a Albarkawa cikin birnin Zariya a cikin 1983. Duka duka a watan Fabrairu na bana ta shigo harkar fim. Ta yi wasa a finafinai kamar su Gundura, Janhuru, Maina, Manufa 2, da sauransu.

A Zariya, ta fada wa wakilinmu yadda ta samu matsala da Rukayya:

Rukayya Dawayya

FIM: Me ya hada ki da Rukayya?

MAIMUNA: E, na taba samun matsala da Rukayya Dawayya. A lokacin daukar shirin Manufa 2 ne muka hadu, ana gobe bikin Balaraba. Da muka hadu muna ta wasa da dariya. Sai aka tafi daukar wakar Hadiza Kabara da Galin Money. Sai ita Rukayya ta tafi ta bar kanwarta. Muna nan zaune sai wani mutum da ake kira 'Game Super' ya fara yi mana dabon kudi. Sai yarinyar, wato kanwar Rukayya, ta ce tan so ya yi mata dabon alewa. Sai ya ce ba zai yi mata ba.

Shikenan sai ta ce mu je cikin Zariya in zagaya da ita ta ga kasuwa. Ta dai dame ni. Sai kuma ta ce in kai ta inda su Rukayya suke shooting (daukar fim). To, muna cikin tafiya sai muka hadu da Mustapha Ibrahim. Sai muka dawo, to ashe ma sun riga sun dawo daga shooting din. Muka tarar ita Rukayya tana ta wasu maganganu.

To, na fito daga cikin mota kenan sai ta hau ce mani wai me ya sa na tafi yawo da kanwarta. Sai na ce, "Ban gane me ya sa na tafi maki yawo da kanwa ba!"

Kawai sai na ji saukar mari.

Ni kuma da haushi ya debe ni sai na rama marina. To a lokacin ne su Aminu Asali da Abubakar Ishaq suka zo suka raba mu.

Kafin kuma mu iso (ofishin) Jari, muna ta cece-ku-ce, zan shiga cikin shagon kenan sai ta sa hannu ta ci mani kwala, sai ni ma na cakume ta. Sai muka fara dambe. Aana raba mu, sai ga Galin Money. Gali ya zo ya raba, yana zaginta. To a wannan lokacin Hadiza Kabara tana goyon bayanta. Amma da Gali ya zo aka maida jawabi sai ta ba ta rashin gaskiya. Daga nan sai ita Rukayya ta fara kuka, ta kuma nade kayanta ta ce ita gida za ta koma. Daga baya sai Hadiza ta zo tana ba ni hakuri.

Zuwa yawo da kanwarta dai ya jawo abin kenan?

MAIMUNA: E, wai na dauki kanwarta zan koya mata iskanci. Ni abin da ya fi ba ni haushi shi ne inda take cewa wai da ma 'yanmatan Zariya ba su da tarbiyya.

Yaya sunan kanwar tata?

MAIMUNA: A'isha.

To yanzu kun sasanta?

MAIMUNA: Har yanzu ba mu shirya da ita ba; ko da mun hadu ba mu magana. In ta nemi mu shirya za mu shirya. Amma ni ba zan yi mata magana ba, sai dai in ita ta fara yi mani magana.

Hadiza ba ta sa an kulle ni ba     Inji Danmaliki

NASIRU Danmaliki shi ne furodusan da aka ba da labarinsa a Filin Malam Zurke lokacin da ya yi rigima da wata yarinya a Zariya wai ita Hadiza Kisisina, aka ce jarumar ta sa an kulle shi a caji ofis bisa laifin ya yi mata kage. To, bayan mun buga labarin sai kura ta tashi, inda Nasiru ya karyata abubuwan da suka faru, musamman da aka ce an kulle shi. A cewarsa, shi dai ya san sun yi fada da yarinyar, to amma ba a sakaya shi ba. Ya dora laifin a kan wanda ya ba mu labarin, ya ce bai ba mu shi daidai ba. Hasali ma dai sai da furodusan ya yi barazana a wata hira da aka yi da shi a mujallar Annur cewa zai kai maganar kotu.

To, mun nemi Nasiru domin mu ji ta-bakinsa a kan al'amarin, wato ya gaya mana abin da ya faru a nasa bangaren. Ya kuma amince ba don komai ba sai don a bari a cikin tarihi cewa ga fa yadda abin ya faru daga nasa bangaren. Bismilla:

FIM: Menene gaskiyar musabbabin fadanku da Hadiza Kisisina ?

DANMALIKI: Kamar yadda na bayyana a wata mujalla, ganin yadda aka buga labarin yadda ba haka yake ba, shi ya sa na yi bayani. Wato abin da ya faru, muna zaune a ofishinmu na 'Ya-Kareem Ventures' da ke nan Zariya, ana hira ana jiran fita zuwa lokeshin daukar wani fim, sai ake maganar wushirya. Sai na ce, "Ai wushirya iri-iri ce, amma duk wushiryar da ta wuce irin tawa to gaskiya ta zama gibi." To, Hadiza tana zaune, sai ta ce, "E, gaskiya kuwa, amma ga wushirya sai dai ba fasali." Sai na ce, "A, to ke kina da fasali ne har kike kushe mutane?"

Wannan kalma da na gaya mata bai mata dadai ba. Sai ta fara maganganu haka. To wannan shi ne ya jawo rigimarmu da ita, har ya kai ga mun yi fada da ita. Ta tafi police station ta yi kara ta. To a lokacin ina 'Ya-Kareem,' kuma ina tare da shugaban wurin, wato Adamu Bello Ability. Na sauko kasa kenan, sai na gan ta tare da wani mutum cikin fararen kaya. Sai ya yi mani bayanin cewa Hadiza ta yi kara ta a wurin 'yansanda, saboda haka ana nemana.

To, da muka je kowa ya yi bayani, sai su 'yansandan suka dauki abin ma wasa, suka ce, "A, kai ai ba haka ake yi ba; in kana son ta ne ka bayyana mata mana!" Na ce, "A'a ai ba maganar haka ne ba, tunda muna tare da ita kuma muna harkokin yau da kullum". Sai ta gaya wa 'yansanda cewa na mare ta. Na ce, "A'a, ni ban mare ta ba. In na mare ta ina shaida?"

Sai aka tambaye ta cewa za ta iya kawo shaida? Ta ce e, amma sai ta kasa kawo shaidar. Sai suka ce to ai wannan abu mai sauki ne, muna iya sulhuntawa. Nan ko take muka yi magana da ni da ita muka sasanta kanmu, muka dawo. Ba kamar yadda aka taba bugawa a mujalla ba, cewa wai an kulle ni har wasu furodusoshi sun yo belina ba. Ni ba wanda ya kulle ni ballantana a ce wani ya yo belina.

Su wa suka raka ka wurin 'yansandan lokacin da aka tafi da kai?

DANMALIKI: Ba wani wanda ya raka ni.

To maganar da ka gaya wa ita Hadiza har ta bata mata rai, da gangan ne ka yi don kawai ta ji haushi ko kana nufin wasa ne?

DANMALIKI: Wato ka san idan aka tafi lokeshin, akwai wasu abubuwa da suke faruwa, wadanda idan ba mutum ya cika kama kansa ba, idan an ga dama ana iya yi mashi gori da wannan. To da zaran ka kushe mutum, shi kuma zai iya dauko wata maganar ya yi maka gugar zana. To ni na yi mata gugar zana ne da wani abin kunya da ta yi a lokacin daukar fim din Janhuru, to shi ya sa, kuma ni wurin kawai na fada, da yake ita ta san maganar, sai ya bata mata rai, to abin da ya kawo rigimar kenan.

Wane irin abin kunya ne ta yi?

DANMALIKI: Yanzu dai ba ni son in fada, saboda bayan na yi magana a mujallar Annur, Hadiza ta zo ta same ni, ta ce ya za a yi in yi wannan maganar? Na ce, "A'a ai waccan maganar ita ta jawo wannan." Ta roke ni cewa don Allah don Annabi, wannan abu tunda an yi ya wuce to in rufa in bar shi a hakanan. To ka ji dalilin da ya sa ni kan kaina ban yi bayanin ainihin cikakken al'amarin ba. Amma da abin ya kai mu zuwa kotu, kotu ta bukaci in bayyana zan bayyana, tunda na gani da idona.

Yanzu wane irin hali ake ciki tsakaninka da ita?

DANMALIKI: Mun shirya da ni da ita. Ba wata matsala tsakanina da ita.

To Danmaliki mun gode.

DANMALIKI : Yauwa, to ni ma na gode.

Zuciya ce ta debe ni na doki Hadiza Kabara
Inji Saratu Gidado

FADAN Saratu Gidado (Daso) da Hadiza Mohammed Kabara yana daga cikin fadace-fadacen da aka yi ta ka-ce-na-ce a kansu. Daya daga cikin mafadatan, Saratu, ta yarda ta bayyana mana abin da ya hada su har suka yi wannan abin tereren. Ga bayaninta:

Hadiza Kabara

FIM: Saratu, yaya aka yi kuka kwashi 'yan kallo ke da Hadiza Kabara?

SARATU: To, gaskiya ni dai na san ina mutunci da ita tun da Allah ya hada mu da ita. Haka kawai sai aka wayi gari na ga ba ta yi min magana. Idan ta zo wuri idan muna da yawa, za ta kira sunan kowa (amma) ba za ta kira sunana ba. Sai na ga me yai zafi? A ka'idar Musulunci ma idan mutum ya zo wuri, kowa zai yi wa magana. To ganin haka, ni ma sai na daure mata.

Haka muke, sai a kira mu mu yi fim tare, mu tafa hannu mu yi wasa mu yi dariya. Amma ana cewa "Cut!" (wato a dakata da wasa), kowa sai ya daure fuskarsa. To, ana haka sai a ranar da mujallar Fim da aka yi hira da Mohammed Kabara ta fito, ni kuma na sayi mujallar ina karantawa, ranar sai abin ya zame mata kamar hauka. To, ko ganin ina karanta wannan hirar da Kabara, shi ne sai ta fara yi min habaici. Da, duk gabar da muke yi ba ta yi min habaici. Sai ta fara yi min habaici da mata; a wani otal ne inda muke fim. Muna kallon satalayit a wata tasha, wata tsohuwa na rawa. Sai Hadiza ta ce, "Mu ma a nan Industry dinmu akwai irin wadannan tsofaffin da ba su da kamun kai." To, kuma ni kadai ce babba a wurin, na san kuma da ni take. Shikenan, ni kuma sai na kalli daya daga cikin abokan aikinmu na ce, "Ah! S. Bello kai fa kwage ne, bar ganinka busasshe, yadda ake ganinka fa, to idanunka da tafin kafarka da tafin hannunka suna nuna tsoho ne kai."

Tun daga nan sai ta yi shiru. Kuma na kara cewa, "Na ma yi imanin ka girme ni tunda ina da sirrinka!" Sai ta yi shiru.

Ka ji abin da ya hada mu.

Saratu Gidado

Rannan sai muka sake haduwa a wurin daukar fim, inda muka hadu a Kwality. Nan ma sai ta fara habaici: "Duniya ta juya wa wadansu; yanzu sin daya sin biyu suke yi; an daina ba su principal character!"

Ni kuma sai na juya na kalli wani na ce, "Kai wai mutumin da ke cin tudu uku - ya yi aikin gwamnati a biya shi, ya saida shadda leshi ya samu riba, kuma yai fim - yau ko cewa aka yi an daina fim da ni ai ina nan ina cin tudu biyu."

Yanzu zancen fada dai ya zama gaskiya kenan ko?

SARATU: Ya zama gaskiya. Da ta kai ni kara wurin daraktan fim din sai ya kira ni ya ce don Allah, don Allah mu daina. Na ce masa, "Wallahi ni ban san abin da na yi mata ba take yi min habaici." Sai ya ce bari ya kira ta ya yi mana sulhu. Na ce shikenan.

Sai ya kwala wa Iliya Tantiri kira, ya ce ya kira Hadiza. Muna tsaye mu hudu - darakta (Mohammed Kabara), ni, Tantiri, da Hadiza. Ya ce, "Yanzu na yi wa Saratu fada kan maganarku. Don Allah ban son jin komai. A yi hakuri."

Sai ta buda baki ta ce, "Wai wannan matar ce ina ganinta da mutunci take buda baki take cewa wai kana kwana da ni."

Sai na ce mata, "Ni na fada maki haka?"

Ta ce, "Kwarai. Ba ki fada wa Hauwa Ali Dodo ba? Ko ba ki fada wa Zahara'u Shata ba? Ko ba ki fada wa Maikaba ba?"

Na harzuka. Sai na ce, "To karya ake? ... Na fada, in da abin da za ki yi!"

Sai ta ce min, "Banza!"

Sai na ce, "Ni ce banzar?"

Sai na cire takalmina na bai wa wani almajiri ya rike min.

Tantiri cewa yake, "Don Allah ku rufa mana asiri!"

Na ce ya ba ni wuri. Ya ki. Yo, da na cafki kafadarsa na hankadar da shi, ya fadi a kasa. Na hankade Kabaran shi ma ya fadi, na cakumo ta, na tadiye kafarta, na hau kan ruwan cikinta ina duka. Aka taru, da kyar aka cire ni daga kanta ina dukanta.

Allah ya kiyaye gaba. Sai dai kuma ke Saratu masu kallon finafinanki za su ce me ya sa babbar mace kamarki za ta yi fada a kan titi a gaban jama'a?

SARATU: Wallahi wallahi ban taba yi ba! Kuma duk 'yanmatan fim muna shiri. Zuciya ce ta debe ni, saboda a gaban jama'a ta ce min banza, na ji ba zan hakura ba. Na san ban da hakuri!

Wannan fadan, tsautsayi ne kenan?

SARATU: Tsautsayi ne. Kuma ni a gare ni ya wuce, don idan mun hadu muna gaisawa irin ta Musulunci. Ko a yinin bikin Abida da muka hadu mun gaisa, a lokacin kuwa ba a fi kwana shida da yin fadan ba.

Allah ya kara wa abokarku danko a daina fada.

SARATU: Amin amin.

Yaran ba su jin maganarmu      - Ramat

Me shugabannin shirin fim ke ciki don magance irin wannan tijara da ake tafkawa a kan titi? Ko 'yanmatan fim suna jin nasihar na-gaba da su? Fim ta tuntubi Sakataren Kungiyar Furodusoshi Mata, Hajiya Balaraba Ramat Yakubu. Hajiyar dai ita ganau ce ba jiyau ba a fadan da aka yi tsakanin Hindatu Bashir da Maryam Mashahama a cikin gidanta.

Balaraba Ramat

FIM: Hajiya, me za ki ce ganin cewa cikin 'yan watanni hudu an sami yawaitar fadace-fadace tsakanin matan fim?

BALARABA: Abin da zan ce shi ne, yara ne kuma ba su gama mallakar hankalin kansu ba. Shi ya sa har za su tsaya su yi fada, su yi zagi su yi duka a kan titi. Duk inda aka san 'ya mace, an san ta da kame kai, da martaba, da daraja, kuma duk ana tunanin wanda ke kewaye da ita yana yi mata kallon wannan kwarjini. To amma har yau aka ce ga 'ya mace wacce ta mallaki hankalin kanta tana sana'a kuma mai daraja irin ta fim, amma a ce yau ga ta tana kokawa da zage-zage da fada - kan namiji ne, kan kudi ne, kai ko a kan menene - ni ina ganin duk inda aka ce 'ya mace ta yi fada, ta zubar da mutuncita.

Akwai wani abin da za ki iya cewa tunda ku ne ake kallo a matsayin shugabanni mata?

BALARABA: Gaskiya mu mu ne shugabanni mata saboda a cikin 'yan wasa da furodusoshi muna daga cikin tsofaffin da ke ciki, ka gane? Yaran ne ba su cika daukarmu da wata daraja ba wadda har za mu iya yi masu fada su ji. Ko da ganinmu suka yi suna yin wani abu na shashanci, maimakon su kau da kai su ji kunyarmu, a'a sai su ci gaba da yi. Tun ina fada har ya zamanto zai zama sun tsane ni. Sai na tattara su na watsar.

Amma idan da za ka tambayi Fati Faka (Fati Bappa Fagge), yarinyar nan da ta yi Mashi, da wasu 'yan mata guda biyu, idan suna yin abu idan na tsawatar masu za su daina. Amma abin mamaki sai na ji an ce wai ga Fati ga Ummi sun yi kokowa - ko a ina ne? a Kwality?, a'a, a HRB! Abin ya ban mamaki.

Ya ci a ce duk wata budurwa ta gane cewar da furodusa da dan wasa da duk wani saurayi nan na waje wanda bai shafi industiri ba in ya zo yana son kawarki, to ki tattara ki bar masa. Abin da ya sa ya daka tsalle daga kanki ya koma wurinta shi zai sa daga can ya koma wurin wata. Kun ga kun maida shi shashasha kenan.

In har za a zo a tsakanin mace a yi kokowa saboda namiji, to ni ba wani namijin da ya isa 'ya mace ta yi kokowa don shi har a daki lafiyata. Sai dai shi ya daki lafiyarsa.

Samari ke haddasa rigingimun      - Nata'ala

Alhaji Nata'ala Aliyu shugaba ne a cikin masu shirya finafinai a Jihar Kaduna. Shi ne furodusan finafinai kamar su Mutum Ko Aljan? da kuma Janhuru. Kuma shi ne shugaban kamfanin 'Jari Video Centre' da ke cikin Birnin Zariya. Saboda haka duk abin da ake ciki game da harkar fim ya sani, musamman fadace-fadacen 'yan fim. Hasali ma dai shi ganau ne ba jiyau ba a fadace-fadace biyu da aka yi a Zariya, wadanda watakila su kadai ne wadanda aka fi sani a Jihar Kaduna, jiha ta biyu wajen yawan fadace-fadacen 'yan fim, wato fadan Rukayya Umar Santa da Maimuna Husaini da kuma na Hadiza Kisisina da Nasiru Danmaliki. Fim ta waiwaye shi a Zariya.

FIM: Me za ka ce kan yawaitar fadace-fadacen 'yan fim, musamman mata?

NATA'ALA: A zahirin gaskiya yawan fadace-fadace da ke faruwa a industiri tsakanin 'yanmata kila a kan samari, to ba laifin matan. Ba azzalumai irin samarin. Duk su suke haddasa fadace-fadacen, saboda sau da yawa za ka ga saurayi daya ya tara kamar 'yanmata biyar, kowacce budurwasshi ce shi kadai. Kuma su 'yanmatan, kowacce tana takama cewa ita ke da shi. To da zaran ta gane cewa akwai soyayya tsakaninshi da wata sai ka ga ba sauran zama lafiya. Duk halin da za ta bi ta raba su za ta yi. To, sanadiyyar haka ne za ka ga ana rigima tsakanin 'yanmatan. Amma wallahi duk laifin mazan ne.

Wace hanya za a bi a magance irin wadannan matsaloli, kuma su wa ke da hakkin magance matsalolin?

NATA'ALA: To ai hanyar gyaran abu ne a bayyane. Kamar yadda na gaya maka, dukkanmu da za mu daina abubuwan da muke yi, to da za a samu gyara.

Komawa babban shafinmu           Komawa saman wannan shafin