HAKIKA, kowa ya san irin cece-ku-cen da ake yi a kan 'yan fim, musamman mata. Kusan gani ake yi duk yarinyar da ta shiga harkar fim, to sallamammiya ce daga gidansu. Da yawa 'yan fim suna ganin tsangwamar da ake yi musu kusan nema ake a dake su, tamkar su suka kirkiro duk wani iskanci da ake yi. To sai dai wani abin mamaki shi ne, duk da irin kyamar da ake yi musu, wadda har ta hada da ko aure kake nema, sai a ce ba za a ba ka ba, wai don kawai kana fim. Amma da wuya ka ga an yi bikin da yake yin armashi kamar na 'yan fim din.
To da yake kun san an ce komai da lokacinsa, da yawa na ganin yanzu yarinya idan ba fim din take yi ba, kusan babu wata hanya mafi sauki da za ta iya tallata kanta har ta samu mijin aure. Ga alama, fitaccen jarumi kuma darakta Ali Nuhu yana daya daga cikin masu irin wannan tunanin, kuma bai bar maganar a cikinsa ba, sai da ya amayar da ita a gaban dubban mutane a wajen bikin Zulai da Lilisco, wato lancin da aka yi a Kaduna a ranar Lahadi, 12 ga Disamba 2003, a 'Space 2000' da ke unguwar Barnawa.
Daga cikin bayanan da daraktan na shirin Khusufi ya yi a lokacin da aka nemi ya tofa albarkacin bakinsa, a matsayinsa na babban abokin ango, Ali ya yi alfahari da yadda 'yan fim suke aure kuma su zauna, musamman manyan 'yan wasa, wadanda wasu ke zaton ba za su dade a gidan miji ba saboda ganin irin sabon da suka yi wa kudi, ga kuma 'yancin walwala, kamar su Fati Mohammed, Maijidda Abdulkadir, Abida Mohammed, marigayiya Balaraba Mohammed, Hindatu Bashir, Rabi Mustapha, Wasila Isma'il, A'iusha Musa, A'isha Ibrahim, da dai sauransu.
Lokacin da yake tsokaci a kan al'amarin 'yan fim, musamman mata, akwai inda jarumin yake cewa, "Jama'a zan ce wani abu. Bara kamar yanzu an yi bikina, wasu sun halarta, wasu kuma kila sun yi aure. To a takaice, ina son duk wadda ba ta samu mijin aure ba, to ta shigo film industiry mu tallata ta, ta samu miji. Sannan kuma a gaskiya ba abin da za mu ce wa 'yan matan industiri, sai Allah-sambarka. Domin a da can baya, gaskiya 'yan matan da ke cikin wannan sana'a akwai wani irin kallo na kaskanci da ake yi musu cikin al'aumma. Amma alhamdu lillahi, yau Allah ya kawo rana da kuma lokaci da suka zamo abin sha'awa, wanda da zarar ance yarinya tana yin fim, to za ka ga maza suna rubibin dauke ta su kai ta gidansu."
Wannan jawabi ya yi wa wasu dadi, suna ganin lallai Ali ya wanke abokan sana'arsa, kuma a wurin da ya dace. To, sai dai kuma wasu (musamman 'yanmata da ba su shiga fim ba) suna ganin kamar ya tozarta su ne Tun daga wurin, wakilinmu ya ji mata da yawa sun fara zaginsa, suna cewa, "An gaya masa mun rasa mazan aure ne da za a ce wai sai mun shiga fim sannan a aure mu?"
Kai wasu ma ofishin mujallar Fim da ke Kaduna suka yo takakkiya suna kumfar baki.
"Ai abin duk rashin kunya ne, domin yawancin masu zagin 'yan fim din, kullum tare da su ake, idan mutum yana ganin mu 'yan iska ne, to ya kaurace mana," inji wani furodusa da ya ce a sakaya sunansa.
Ga alama, 'yan fim da dama za su yi na'am da kalamin da Ali ya yi, sabanin dariyar da suka rika yi masa lokacin da jama'ar gari suka yi masa caa a kan kalaminsa kan malaman Mass Comm. Don haka lallai za mu iya cewa yanzu 'yan fim a shirye suke su fara maida martani ga masu yin batanci a kansu. Ali Nuhu ya bude musu kofar yin hakan.
Komawa babban shafinmu Komawa saman wannan shafin
