Dimbin 'yan fim sun halarci daurin auren, kamar su Ishaq Sidi Ishaq, Salisu Mu'azu, Misbahu M. Ahmad, Sani Danja, Yakubu Muhammad, Tijjani Paris, Shu'aibu Idris Lilisco, Abubakar Sani, Idris Danzariya, Ahmad Dandirimi, Bala Anas, Ahmad M. Sarari, Aminu Shariff, Nasiru Dararrrafe, da sauransu.
Da yamma, an shirya walima a dakin karatu na 'Theatre One' da ke cikin Jami'ar Bayero. Da karfe hudu aka ce za a fara, amma ba a fara din ba sai bayan karfe 8 lokacin da angon da amaryar suka iso wurin. Mawakan finafinai maza da mata sun yi kara don taya dan'uwansu murna, inda suka cika zauren walimar. A wurin har da baki daga nesa; misali wasu 'yanmata, Hussaina Emmanuel da Hauwa Ibrahim, sun ce daga Gombe suka zo Kano sai suka tsinci labarin auren na Sadi, shi ne suka tsaya domin su ba idonsu abincinsa.
Bayan gabatar da ma'auratan, an ba jama'a damar su tofa albarkacin bakinsu a kan auren.
Wani abin burgewa hi ne wakokin da shahararriyar zabiyar nan Jamila A. Sadi ta rera wa ma'auratan. Jamila dai budurwar angon ce wadda Suwaiba ta kasa. Wakar "Ina Sonka Na Yaba da Halinka" ta cikin Cika Aiki, ta rera ta a wurin musamman saboda angon. Hauwa Ali Dodo ma ta rera wakar "Carmandudu."
Sauran mawaka ma sun gwada fasaharsu.
Da yake an tabo gonar angon, shi ma ya mike ya rera wata waka da ya shirya domin abokan aikinsa da ba su yi aure ba, irin su Misbahu wanda shi ma yake kan hanyar auren Rukayya Dawayya. Taken wakar shi ne: "Ni Sadi A Yau Na Yi Aure, A Yau Ba Ni Ba Kwanan Soro." Masoya sun yi wa angon da amaryar ruwan naira.
Wani abu da aka yi a wannan daren shi ne nadin sarautar Garkuwan Sadi Sidi Sharifai, aka nada Aminu Mai Dawayya wanda mawaki ne da ya gwanance wajen kwaikwayon wakokin da Sadi ya rera, kamar wakokin shirin Ibro Awilo.
Washegari bikin ya ci gaba inda aka yi kalankuwa (gala) a gidan sinima na Goron Dutse. Abu dai tubarkalla. Mu ma a mujallar Fim muna taya Sadi da Suwaiba murnar wannan auren. Allah ya ba su zaman lafiya da zuri'a dayyiba, amin.
Bikin tarewar Ahlan da A'isha ya burge jama'a
DAGA WAKILINMU
Ango da Amarya: Ahlan da A'isha
|
A RANAR 26 ga Oktoba, 2002 aka yi bikin tarewar dan wasa Ahlan Shariff Ahlan da amaryarsa A'isha, wadanda muka ba ku labarin aurensu a fitowarmu ta watan ..... na bana.
An yi bikin tarewar a 'Meena Heart Restaurant' da ke harabar Gidauniyar Jihar Kano a kan titin Gadon Kaya a Kano da daddare.
Bikin ya samu halartar dimbin fitattun 'yan fim irin su Ali da Ahmad S. Nuhu, Baballe Hayatu, Sulaiman Gambo Awaisu, Ibrahim Mandawari, Shehu Hassan Kano, Mika'il ibn Hassan (Gidigo), Aminu Kwai-A-Baka, Mohammed Garba Kabara, Rukayya Dawayya, Maryam Mashahama, Hadiza Kabara, Ummi Nuhu, Zahara'u Shata, Rabi'u Ibrahim, Jamila Haruna, da sauransu.
Karfe 4 aka yi niyyar fara bikin, amma sai karfe 8:30 aka fara duk da yake an rubuta a katin gayyata cewa, "No African Time," wato ban da makara.
Yawancin abin da aka yi a wurin shi ne rawa da waka, inda akan sako wakar wani fim a rikoda sai a kira 'yan wasa su bi wakar suna yi tare da yin rawa.
'Yan'uwan amarya da na ango sun hallara su ma, tare kuma da mutane 'yan kallo wadanda wasu daga cikinsu sun so su tada hargitsi a wurin inda ta kai an yi sa-in-sa da wasunsu da Mandawari da Rabi'u mai kamfanin 'HRB Enterprises.' Duk da haka an yi bikin lafiya aka kuma tashi lafiya. Allah ya bada zaman lafiya, amin.
Komawa babban shafinmu Komawa saman wannan shafin
