JARUMIN fim din Training Day, wato shahararren dan wasan nan Denzel Washington, shi ne ya ci kyautar Jarumin Jarumai Maza a gasar finafinai ta duniya mafi shahara, wato Oscars, ta bana. Sau uku ana zabensa a mataki na kusa da na karshe, amma sai a bana ne ya samu sa'a ya doke manyan jarumai irin su Rusell Crowe, Sean Penn da Will Smith.

Haka kuma jaruma Halle Berry ce ta lashe gasar a ajin Jarumar Jarumai Mata saboda wasan da ta yi cikin shirin Monster's Ball. A da, an zaci cewa Dame Judi Dench ko Nicole Kidman ce za ta cinye zaben.

Mai ba da umarnin nan Ron Howard shi ya doke 'yan maza a matsayin Daraktan Daraktocin Duniya, tare da fim dinsa A Beautiful Mind, fim din da har ila yau shi aka zaba a matsayin Gwarzon Fim na bana.

An rarraba kyaututtuka a bangarori daban-daban ga wasu zakarun. A karshe an ba da kyaututtuka na musamman ga wasu mutum uku da aka ga lallai sun taimaka wajen habakar shirin fim na Amerika, su ne Sidney Poitier da Robert Redford da Arthur Miller.

An yi bikin bayyana zakarun gasar ne a dandalin 'Kodak Theatre' da ke cikin unguwar 'yan fim ta Amerika, wato Hollywood, a birnin Los Anjalis.

Wani abin juyayi a bikin shi ne yadda bakaken fata suka yi zarra a gasar bana, abin da ba a saba gani ba. Su ne Denzel Washington da ita Halle Berry. Jawaban da suka yi sun nuna yadda akan maida bakake gugar yasa a gasar Oscars; duk da fasahar iya wasa da bakake suke da ita, ba a cika ba su manyan kyaututtuka ba. Misali, rabon da a ba mace bakar fata matsayin Jarumar Jarumai Mata yau shekara 74. Shi ya sa ake ganin lallai bikin na bana biki ne na bakaken fata.

Lokacin da Halle Berry ta zo yin jawabinta, ta yi ta rusa kuka, tana cewa, "Wannan zamani da muka shigo ya fi karfina. Wannan karramawa ce ga dukkan mata bakaken fata wadanda suka wuce ba a san su ba, wadanda sai yau aka bude masu kofa. Lallai a yau an rusa iyakar da aka yi mana (mu bakake) kuma ina fatan wannan rusawar da aka yi za ta kasance a haka har abada." Wai har wasu na ganin bai kamata ta fadi haka ba don kar a ce ta yi wa fararen fata shagube.

Shi ma Denzel sai ya ce a cikin raha, "Shekaru arba'in ina biye da sawun Sidney (Poitier) to me kuwa suka yi - in ba suka ba shi kyauta shi ma a wannan daren ba."

A cikin 1990 an ba Denzel kyautar Jarumin Jarumai na Biyu saboda wasansa a wani fim mai suna Glory.

A bikin na bana an ba fim din The Lord of the Rings: The Fellowship of the Ring kyaututtuka hudu, koda yake ba su kai matsayin Gwarzon Fim da aka yi zaton shirin zai ci ba. Sannan wasu finafinan da aka zaci za su doke kowanne, wato Moulin Rouge da Black Hawk Down, sun ci kyaututtuka biyu biyu kowannensu, sannan dan wasa Jim Broadbent ya ci kyautar Jarumin Jarumai na Biyu (Best Supporting Actor), irin matsayin da Ahmed S. Nuhu ya ci a gasar Arewa lokacin da Momo ya ci matsayin da a yau Denzel Washington yake a kai a Amerika.

Kada ku manta, a Amerika suna ba da kyauta ga Jarumar Wakar Fim wadda mu ba a ba da ita a nan. A Oscars, wakar "If I Didn't Have You" wadda Randy Newman ya rera aka sa a fim din Monsters, Inc., ita ta ci kyautar.

Bikin na Oscars, wanda kuma ake kira 'Academy Awards,' ya shero mutane kwarai musamman saboda yadda mai gabatar da bikin, jaruma Whoopi Goldberg, ta rika tsokanar mutane tana sa kowa tintsirewa da dariya.

A bara, fim din Gladiator ne ya ci Gwarzon Fim da kyaututtuka biyar, kuma aka nada Russell Crowe Jarumin Jarumai. A bana, duk sun zama 'yan kallo domin biki ne da bakar fata suka lashe suka sude.

A fitowarmu ta gaba: Za ku ji tarihin Denzel Washington da fadi-tashinsa a harkar fim, har ya kai ga wannan matsayi da ya hau a bana. Ku biyo mu!

Komawa babban shafinmu           Komawa saman wannan shafin