"WAI iskokai gare su ko kuwa 'yan iska ne kawai." Abin da ya bai wa mai daukar hoto Nasiru Dorayi (DOP) mamaki har ya fadi wannan kalma shi ne yadda wasu mata 'yan fm suka rika hawan bori da nufin bugun aljanu a garin Dawakin Tofa cikin talatainin dare lokacin da aka je daukar shirin wani fim mai suna Ga Koshi a can. Irin wannan abu yanzu ya zama ruwan dare a cikin industiri a Kano.

Sau da yawa a wuraren daukar fim za ka ji kuma ka ga budurwa ko mace da yawa cikin dare suna bori suna fizge-fizge da kakabi, suna kiranye irin na surkulle. Wani mai daukar hoto da ya ce ya sha ganin irin wannan abin mamaki ya bayyana mani cewa shi a 'NNDC Quarters' ya fara ganin wannan al'amarin; lokacin an je daukar wani shiri ne mai mai suna Jalala, cikin Disamba 2002. A wurin, cikin dare sai 'yanmata hudu suka hau bori. Hankalin darakta Murtala Madaki da sauran ma'aikatansa ya tashi sosai. Daga bisani an yi sa'a wani dan wasa da ake ce wa Soja ya rika yi masu karatu da adduo'i . 'Soja' ya shaida wa jama'a cewa daga cikin 'yanmatan hudu daya ce kawai ke da aljanin gaskiya. Sauran, a cewarsa, karya suke yi. Lokacin da yake yin addu'o'i da karatu, an ce aljanar da ta hau kan 'yar wasan ta roki a daina karatun. Da aka tambaye ta dalilin hawa kan 'yar wasan sai ta ce bata mata rai aka yi, kuma ita ba Musulma ba ce. Wannan kalamin dai duk ita yarinyar da ta hau borin ake jin tana fadarsa.

A garin Makarfi kuwa, can ma 'yan wasa sun je don yin shirin fim mai suna Kash Kaico. Da safe har kowa ya yi wanka za a fara daukar fim din wai sai wata 'yar wasa mai suna Jummai da kuma fitacciyar jaruma Ladi Mohammed (Mutu-Ka-Raba) suka hau nasu borin. Wani wanda aka yi abin a gabansa ya gaya mani cewa dalilin hawansu shi ne wai wani ne ya shiga wurin sanye da turare mai karfi.

Ko lokacin da ake daukar shrin fim din Qauli na kamfanin 'Fatima Production', wanda darakta Tijjani Ibraheem ya bada umurni, irin haka ta faru. A unguwar Kwanar-Ungogo a Kano abin ya faru. Wadanda abin ya faru a kan idonsu sun tabbatar da cewa wani al'amari ya faru da Ladi Mutu-Ka-Raba. A can ba bori ta hau ba. Ana cikin daukar wani sin ne inda darakta Tijjani ya ce ta fadi "Police da Judiciary" amma wai an kusan kwashe awa daya cur Ladi na kokarin fadin wadannan kalmomin, amma ta kasa. An ce duk lokacin da ta buda baki za ta fada, sai abin ya gagara har dai abin ya kai ta ga hada gumi sharkaf.

An yi kokarin a sauya Ladi daga rol din na matsayinta na babbar alkali (chief judge), amma furodusan fim din, Baba Shariff, ya ce ba zai sauya ta da kowa ba.

Shin da gaske Mutu-Ka-Raba 'yar bori ce? Ko kafin mu tafi nemanta an gaya mana cewa ko an je ma ba za ta ce e, ita din ba ce. Don haka ba mu yi mamakin jin amsarta ba; amma kila kuma ba ta da ljannun. Ladi dai ta ce karya da sharri ne kawai ake yi mata.

TAMBAYA: Ana surutu cewa wasu 'yan fim na da iska har sukan hau bori a lokeshin. An ce kina daga cikinsu. Shin ya gaskiyar abin take?

LADI: Ba na cikinsu. Sharrin mutane ne.

TAMBAYA: Da ake cewa kin hau bira'izai a garin Makarfi fa?

LADI: Can ma mun yi fim mun gama lafiya.

TAMBAYA: An kuma ce a wurin daukar fim din Qauli a Kwanar Ungogo wai 'mutanen' naki sun hana ki cewa "police da Judiciary". Ya abin yake?

LADI: Ni ban sani ba. In ma sun hana ni to ai za a kalli fim din. Karya ne.

TAMBAYA: To me za ki ce kan masu yi maki surutun cewa kina da iska?

LADI: Abin da zan ce shi ne mutane su tuna fa aljani ba abin wasan mutane ba ne. Kuma in ina da su, ina roko Allah ya yaye min tunda ba saya na yi da kudina ba. Kuma duk mai su Allah ya yaye masa. Kuma ba sa cutar da ni in ma ina da su. Kuma duk dan' adam yana neman hirji gare su.

TAMBAYA: Da ma idan kina da su ana so a ji ya aka yi kika sami abin. Shin Musulmi ne ko arna? Kuma an taba kokarin cire maki su ta hanyar rukiyya ko girka? Sai kuma ana so a ji sharaddUn da suka gindaya maki.

LADI: (Bayan ta yi dariya kan irin mamakin da ta yi da tambayoyin): Wai shi (wanda) da ya rubuto maka wadannan tambayoyi, ina ya kwakulo labarin da tambayoyin? To ni ban tabbatar ina da su ba ko ba ni da su ballantana in ce an taba yi min wasu abubuwa a kai. Amma ina so ka fada masa idan zai iya bugawa to ga sharuddun da suka kafa min... Sharadin da suka kafa min in ka ji shi… shi ne wai sai na aure ka. Kuma daga yanzu ka rika sayo min man shafawa, sabulu da turmin atamfa duk wata.

TAMABAY: Madalla, mun gode.

LADI: Ni ma na gode.