FITACCEN dan wasan nan da ke Kaduna, A. S. Mohammed, ya yi kakkausar suka a kan wadansu munanan halaye da wasu 'yan fim ke nunawa, musamman ga masoyansu 'yan kallo. Jarumin na shirin Maina ya ce kamata ya yi duk wata dabi'a mai kyau a same ta wajen dan fim, amma maimakon haka sai wasu su rika amfani da daukakar da Allah ya yi musu su rika zubar da mutuncinsu. Dalilin da ya ba da na yin wannan tsokaci shi ne, da yawa sai ka ga dan fim da bakinsa yana rokon masoyansa wani abu, musamman katin G.S.M., ko wurin kwana, ko ka ji dan fim yana cewa, "To yau dai muna wuri kaza, Allah ya sa a kawo mana abinci!" A cewar A.S., wannan ba karamin abin kunya ba ne da zubar da mutunci, musamman ga su 'yan kallo masoyan finafinai.

A wannan tattaunawar ce kuma, Fim ta yi amfani da wannan dama ta yi wa jarumin tsokaci a kan abin da ya hana kashi na biyu na fim din Maina fitowa. Amsar kawai da ya iya bayarwa ita ce, "E, to rashin yin fim din Maina kashi na biyu, zan ce ya bata mani rai, saboda ba haka aka so ba, wai kanin miji ya fi miji kyau. In da so samu ne, a yi shi na daya da na biyu gaba daya. To amma kuma idan har akwai takura, to shikenan. Saboda ai bayan fim din Maina na yi finafinai da yawa ga su nan, wadansunsu ma duk ba su fito ba."

Mun tambayi A.S. a matsayinsa na babban aminin furodusan fim din na Maina, wato Nasiru Garba Dan Funtuwa, shin ko rashin kudi ne ya sa furodusan ya kasa shirya na biyun? Sai ya amsa da cewa, "To a gaskiya na yi masa wannan tambaya ni kaina, sai ya ce mani kawai in saurare shi, akwai abin da yake jira, to har yanzu dai shiru."

A kan rashin jin duriyar Nasiru, A.S. ya kada baki ya ce, "Ai ya ma bar garin, wai ya koma Funtua da iyalinsa baki daya. Kuma har yanzu ba wanda ya tuntuba game da fim din. Kai, mu ko labarinshi ma ba mu ji!"

To idan haka ne kuwa, za a iya cewa Nasiru ya gudu ya bar ladarsa. Domin kuwa binciken mu ya nuna cewa 'yan kallo da yawa suna jiran fitowar Maina 2. Sai dai ko da shi furodusan bai yi ba, mun ji ana rade-radin cewa jarumar fim din, wato Hauwa Maina, da kuma shi A.S. a shirya suke idan furodusan zai ba su dama su ci gaba da shirin na biyu.

Komawa babban shafinmu           Komawa saman wannan shafin