GODIYA ta tabbata ga Allah, Madaukakin Sarki. Allah ya yi tsira ga Manzonsa Muhammadu dan Amina (s.a.w.) da sahabbansa da alayensa.

Wannan watan da muka shigo na miladiyya, wato Maris 2003, wata ne na farin ciki a gare mu a ofishin mujallar Fim. Dalili shi ne a wannan watan ne mujallarmu mai farin jini, Fim, ta shekara hudu da kafawa. Wadanda suka san tarihinta za su tuna da cewa ta fara fitowa ne a cikin watan Maris 1999, a daidai lokacin da harkar fim ta fara bunkasa.

Abin farin ciki ne a gare mu cewa mujallar ta kawo wannan lokacin duk da dimbin kalubalen da ta fuskanta daga bangarori daban-daban. Amma maimakon mu shirya gagarumin bikin taya kanmu murna, sai muka ga ya dace mu yi addu'o'i a kebance na godiya ga Allah (s.w.t.) saboda arzikin da ya yi mana, tare da bukatarsa kan ya ci gaba da agaza mana a wannan aikin mai wahala.

Wahala! E, wannan aiki ne mai matukar wahala. A cikiin wadannan shekaru hudu na hakilon fito maku da mujalla a duk wata, mun sha tasku kwarai. Mun sha wahala wajen neman irin labaran da muke ganin sun dace masu karatunmu, wadanda babu shakka sun nuna cewa suna yarda da abin da muke rubuta masu, su karanta. Irin wadannan labaran, masu inganci ne, wadanda ake rubutawa a cikin lafazi mai dadi da hikimar harshe. Idan an same su kuma sai matsalar buga su-tace su da tsara su a komfuta da kai su madaba'a inda ake buga mujallar. Akwai kuma matsala ta rarraba mujallar a garuruwan da muke iya kai ta, sai matsalar sayar da ita, sai kuma matsalar karbo kudi. A duk lokacin da muke fafutika kan aiwatar da abu daya, muna kuma shirin fitowar mujalla ta gaba! A cikin kowane aiki da na zayyana a nan, akwai wadansu manyan matsalolin a kwance.

Duk da haka, ba matsaloli kawai ba ne muka sha; mun sha dadin aikin, musamman ma mu ga cewa mun samu wani labari da muke nema kuma mun buga shi. Idan aka tambaye ni in fadi babbar nasarar da muka samu wajen buga Fim cikin shekarun nan hudu, zan ce shi ne dorewar mujallar. Domin kuwa mun ci karo da kalubale da suka yi barazana ga dorewarta. An yi mana jan ido, an ce za a halaka mu (har ma wani furodusa ya yi kudirin kashe mu din a aikace!), an yi yekuwar a daina karanta mu ko yin hulda da mu, an ci namanmu ba bisa hakkinmu ba, an cinye mana kudi bayan an sayar da mujallar, an kai mu kara kotu (a yanzu haka muna shari'a da wani da yake son mu biya shi diyyar naira miliyan 50 don mun buga hoton matarsa da ta rasu!), an shiga an fita don a karya mu. Bugu da kari, kudin kayan aiki irin su takarda da ladar dab'i duk sun yi tashin gwauron zabo. Duk wadannan matsaloli ne, amma ba su hana mu ci gaba da aikinmu ba. Sara da sassaka ba ya hana gamji toho. Kamar yadda na taba fadi, a bisa akida muke yin wannan aikin-ba kawai don neman kudi ba; akidar nan kuma ita ce mu ga mun taimaka wa masu kokarin ganin an habaka harshen Hausa da al'adun Hausa. Shi ya sa ma muke saka mujallar a intanet don kowa ya gan ta a ko'ina yake a duniya. Shi kuwa mutum mai akida, ba ya tsoron barazana kowace iri ce.

Wani babban abin da ke faranta mana rai shi ne cikakken goyon bayan da masu karatunmu da 'yan kasuwa masu sayar da mujallar da kuma dimbin 'yan fim suke ba mu. Da yawa sun ba mu shawarwari, a rubuce ko ta-baki, kan yadda za mu gyara aikinmu; wasu sun fahimce mu kan kurakuranmu, wasu sun sa mu a hanya a inda suke ganin mun baude. Wannan ya sa a koyaushe guyawunmu suke kara karfi, aniyarmu take kara daskarewa, muke ci gaba da aiki babu kama hannun yaro. Mun gode, mun gode, mun gode! Jama'a, goyon bayanku gare mu ne fa ya sa kuke ganin Fim ba ta taba yin fashin fitowa ba komai ruwa ko zafin rana tun daga lokacin da ta koma wata-wata yau shekara uku! Kuma shi ya sa, idan kun lura, tsarinta ya kara ingantuwa, musamman fitar hotuna da kyan dab'i. A kan haka, mun kudiri aniyar ganin aikinmu ya ci gaba da gyaruwa har ya kai koluluwar inganci a fagen aikin jarida na Hausa.

Ya Allah, muna rokonka, ka ci gaba da agaza mana; ka sanya mu a kan hanya tagari; ka kautar da dukkan kuskure daga faruwa a gare mu; ka tsare mu daga sharrin masharranta daga cikin bayinka wadanda suke bidarmu da sharri; ka sa mu kasance taurari a cikin samaniyar aikinmu; ka yafe mana kurakuranmu; ka ba mu koshin lafiya da hikima da karfin imani, ka kawo ci-gaba tare da natsuwa a harkar shirin fim na Hausa ta yadda harkar za ta amfani mai yin ta da kuma wadanda ake yin ta dominsu, kuma ka sa yadda muka ga cikon shekarar nan ta hudu da fara wannan aiki, mu ga cikon shekaru hudu nan gaba a aikin. Fatiha!