Balaraba Mohammed

KWANAN nan wadansu bayin Allah daga cikin masu harkar shirya finafinan Hausa suka taru suka kafa wani kwamiti wanda suka rada wa suna 'Gidauniyar Tunawa Da Balaraba.' An kafa kwamitin ne domin a samu hanyoyin da za a bi don karrama shahararriyar 'yar wasan nan Balaraba Mohammed, wadda Allah ya karbi ranta a ran 16 ga Maris, 2002, kwana daya bayan an daura mata aure da Shu'aibu Lawan. 'Ya'yan wannan kwamiti ba wasu ba ne illa wasu wadanda suke ganin yin Gidauniyar ya fi rashin yin ta alfanu.

Duk wanda ka dauka a cikinsu kuma za ka tarar yana da matsayi na girmamawa ko mai daraja a cikin da'irar shirin fim. Shugaban kwamitin dai fitaccen darakta din nan ne kuma dan wasa, Malam Ishaq Sidi Ishaq. A cikin membobi kuma akwai Hajiya Balaraba Ramata Yakubu, fitacciyar marubuciya kuma jagora a cikin furodusoshi mata da maza. Akwai Malam Hafizu Bello, fitaccen daraktan finafinai kamar su Huznee, Hauwa 1&2, So..., Gagarabadau, da sauransu. Sai Malam Bala Makosa Zariya, daraktan shirin Karbala kuma editan mujallar Nishadi. Akwai Malam Ahmad Salihu Alkanawy, furodusan finafinai kamar su A'isha da Dawayya; sai Malam Nata'ala Aliyu, furodusan finafinai kamar su Tabbas da Mutum Ko Aljan? kuma shugaban kamfanin 'Jari Film Production,' Zariya. Sa'annan akwai Hajiya Saratu Gidado, fitacciyar 'yar wasa. Akwai kuma dan sanda Muhammad Bashir Yahuza Malumfashi, da editan mujallar Fim Ashafa Murnai Barkiya (sakataren kwamiti), da mawallafin mujallar Fim, Ibrahim Sheme.

Jera wadannan sunayen a haka yana da muhimmanci domin a san cewa ba mutane ba ne masu wasa da abin da bai kamata a yi wasa da shi ba. Mutane ne wadanda ba za su yarda su sa kansu cikin wani sha'ani inda sunansu zai baci ba. Sun yi amanna da cewa yin Gidauniyar Balaraba ya dace saboda gudunmawar da ta bayar ga ci-gaban shirin fim, kuma tare da la'akari da cewa mutuwa tana kan kowa. Wannan yunkurin ya zo a daidai lokacin da ya kamata 'yan fim su yi wa kansu kiyamul laili suna taimaka wa kansu da kansu.

Fatan 'yan wannan kwamiti ne, da kuma duk mai kaunar Balaraba, a tara kudi ko wani nau'i na karramawa, don a ba magadan marigayiyar. Babu wani memba na kwamitin da ya shiga cikin shirye-shiryen aiwatar da Gidauniyar da nufin ya samu kwabo daga ciki, ko wani abu. Ya zuwa yanzu, kwamitin ya yi taro har sau uku a Kano, yana tsara babban taron kaddamar da Gidauniyar. Abin sha'awa shi ne har masoyan Balaraba da 'yan fim sun fara tambayar yaushe za a kaddamar da Gidauniyar, kuma me ake so su bayar. Fatanmu shi ne masu karanta mujallar Fim da duk wani mai kaunar 'yan fim su goyi bayan wannan yunkuri na kafa tarihin kaddamar da Gidauniyar Balaraba.

A cikin wannan mujallar, shugaban kwamitin, Ishaq, ya yi bayani a kan manufar Gidauniyar. Za a kaddamar da Gidaunbiyar a ran Asabar, 6 ga watan gobe (Yuli) a 'Marhaba Cinema' da ke Kano. Muna fatan jama'a za su zo. I B R A H I M S H E M E

Komawa babban shafinmu

Komawa saman wannan shafin